Ds Tanti isch am 13. Dezember 1934 als zwöits Chind vom Emil u der Katharina Schopfer-Kohli ufem Heiti uf d Wält cho. Ihri Schweschter Susanna, wo es Jahr vorhär isch uf d Wält cho, hät sie nie glert kenne, wil sie scho churz nach ihrer Geburt isch verstorbe. 1938 isch Simon gebore u hät d Familie komplett gmacht. Bereits 1939 isch d Familie eds Dörfli züglet, wil ihri Mama der Bazar hät übernoh. Ds eifacha Hüsli ufem Heiti heisi dem Unggle Hans u der Tanta Trudi vermietet. Während dem Zwöite Wältchrieg häts em Gsteig geng Militär kabe. D Mama Kätheli hät sogar die grossi Stube ads Militär vermietet u ab u zue häts de öppis Feins us der Militärchuchi für die ganzi Familie gä. 1944 isch d Familie umhi zrugg uf ds Heiti züglet.

Ds Tanti u ihra Brueder Simon hei e glücklichi Chindheit erläbt. E de Ferie heisi ihre Verwante z La Tour bsuecht. Bsunders mit ihrne Cousine Leni u Suzanne hät ds Tanti e sehr e liebevolli Fründschaft pflegt. 1951 isch d Marianne er Chilche Gsteig konfirmiert worde. Derna isch sie uf Morges, wo sie es Wälschlandjahr als Au-Pair hät gmacht.

Mit 18ni hät ds Tanti z Biberist d Usbildig zur Säuglingspflegerin agfange. Z Biel, wo sie nähär hät gschaffet, hät sie ganz schöni Jahr erläbt u mit viel Fröid u Engagement ihra Bruef chöne usüebe. Es isch och e där Zyt gsi, wo sie ihri Fründin Lotti hät glert känne. Us där Bekanntschaft isch e töifi u innigi Fründschaft worde, wo bis zletscht isch pflegt worde. No em Juli hei ds Lotti u ihra Maa Hans zäme mit ihrer Tochter ds Tanti em Pfyffenegg bsuecht. Ds Tanti hät siech dadrüber sehr gfreut u isch sehr dankbar gsi, dass sie sich no e Tour hei chöne gseh.

Us gsundheitliche Gründe hät ds Tanti nächhär ed Privatpfleg gwächslet. Eso isch äs ono vel er Wält umha cho. Bis nach Dänemark, Frankrych, Spanie, England u Griecheland hät sie mit ihrne Schützlinga dörfe mitreise. E türe Hotel u a wunderschöne Feriedestinatione hät sie eso dörfe uf die Chind ufpasse. Ünses Tanti isch geng sehr pflichtbewusst u seriös gsi. D Chind, wo ihra sie avertruwt worde, si bi ihra geng wohlbehüetet u i beschte Hände gsi. Ds Tanti hät geng gäre vo där ufregende u spannende Zyt verzellt.

E wyteri Stell hät d Marianne er Feutersoey bir Familie Rychebach em Rössli agno. Der Hubert isch ihra bsunders fescht ads Härz gwagse u die beide hei vel Zyt zäme verbracht. Eso isch ds Tanti o zu sim Übername Nini cho. Mängisch isch ds Tanti mit Hubert o ufem Heiti bir Mama Kätheli gsi.

Mit grosser Fröid hät ds Tanti o am Familieläbe vo ihrem Brueder Simon und ihrer Schwägerin Heidi teilgno. D Geburt vo Mario u mier si für ihns es grosses Ereignis gsi u si hät e grossi Fröid a üns beide kabe. D Marianne isch es liebs u hingäbigvolls Tanti gsi.

Afangs vo de 70er-Jahre hät ds Tanti vo der Chinderpfleg ed Betrüwig vo betagte Mänsche gwägslet. Sie hät über e längeri Zyt e Frou z Bärn betrüwt. Während där Zyt isch Mario wäge syr Chrankheit für drüi Monet em Spital Elfenau z Bärn gsi. Sie hät ne sovel, wie nome möglich isch gsi, bsuecht u isch na echlei ga hämpfele.

1976 hät ds Tanti ihri Stell z Bärn kündiget u hät sich vo dänd an um die chranki Mama ufem Heiti kümmeret. Wo d Mama 1978 isch gschtorbe, hät d Marianne e Stell z Merlige bimene ältere Maa agno. 1981 isch ds Tanti chrank worde u de hät si ihra Bruef ufgä. Vo dänd an isch sie zäme mit der Familie vo Simon u em Heidi em Elterehus ufem Heiti deheime gsi. Für üns Chind isch das wunderschön gsi, wil sie hät geng für üns Zyt kabe. Meischtens, weni mit mir Schuelfründin Sabine ha Ufgabe müesse mache, heiwer vom Tanti Tee u Petits Beurres serviert übercho. Mario u ds Tanti hei geng es sehr ängs u vertruwts Verhältnis zunendand kabe. Äs isch geng umhi faziniert u o stolz gsi, wie sich Mario a d Abmachigi mit ihm hät ghalte, u wes die abgmachti Zyt isch gsi, o pünktlich bim Tanti zum Ufgabemache isch erschine.

Ds Tanti hät sich aber o geng uf ds Heidi u Simon chöne verla. Wäge ihrer Chrankheit isch sie vel bi üns am Tisch gsi u häts sehr gnosse, a ünsem Famileläbe teilzha. Ds Tanti hät ihri Schwägerin, ds Heidi, geng sehr gschätzt u gäre kabe. Sie isch ihra geng sehr dankbar gsi. Die vele Telefon u liebe Bsüech vo ihrer Schuelfründin Anneli Buri u ihrer Cousine Therese Gander hei ihra echlei Abwägslig e Alltag bracht. Gäre si ds Anneli u ds Tanti am Sunntig zäme mit dem Poschtouto uf d Pille gfahre u hei da zäme zmittagnet.

Speter hät ds Tanti o fescht Ateil a myr Familie gno. Franz hät sie vo Afang a eds Härz gschlosse u hät na gschätzt. Äs hät geng gseit, dass sie glücklich u dankbar sigi, dass är zu ihra Familie ghöri. Wo d Anja u der Luca uf d Wält si cho, hät sie risigi Fröid kabe. Wes irgendwie isch möglich gsi, hät si däne zwöi chlyni Gschänkleni gmacht u zu jedem Geburtstag het ds Tanti e Charte mit emene passende Sujet uf die Poscht ta. Die letschti Geburtstagscharte hät ünsi Anja am 23. Ougschte em Briefchaschte gfunde.
2006 isch der Zueschtand vo ds Tantis Psyche eso schlächt gsi, dass e Ufenthalt er Klinik Meiringe isch nötig worde. Dä hät aber net der erhofft Erfolg bracht. Churz druf hät äs sälber entschide, dass äs eds Altersheim wott ga. Zersch isches eds Altersheim Rüebeldorf gange u sit em 2007 isches em Alters- u Pflegeheim Pfyffenegg deheime gsi. Ds Tanti hät da wie ne Familie gfunde u hät siech vo Afang an sehr wohl gfüehlt. Äs isch syr Lydeschaft nahagange u isch fasch wüchentlich ed Brockestube vom Froueverein Saane oder e die vom Ueli u der Margrit Schopfer gange. Geng wider hät äs da chlyni Koschtbarkeite gfunde, wo sie dermit ihres wunderschöna Zimmer em Pfyffenegg hät chöne dekoriere. Äs hät sich a all däne Sache geng sehr chöne erfröwe. Wo 2011 ihra über allze gliebta Neuveu Mario plötzlich isch gschtorbe, hät das ds Tanti ganz fescht troffe.
Ds 2013 isch für ds Tanti gsundheitlich es schwirigs Jahr gsi. Äs hät Operatione müesse über sich la erga u d Heilig isch nome langsam vorwärts gange. Mit vel Optimismus u starchem Wille hät äs sich zruggkämpft. Äs hät sogar umhi alleinzig mit dem Rollator eds Saanendorf ihri geliebte Brockestubi dörfe ga bsueche. Churz vor ihrem 81. Geburtstag isches umhi schlächt zwäg gsi. Aber o da hät äs sich umhi guet erholt u hät us där Zyt ds Bäschta gmacht.
Im April 2017 hät äs mier no e Spruch mit ufe Wäg gä, woni euch nid wätti vorenthalte: «Geniesse, was das Heute dir bietet. Verschenke ein Lächeln und bekomme eins zurück. Gehe gut gelaunt in den Tag und dir kann so schnell nichts etwas anhaben. Nimm dir Zeit für dich und tu deiner Seele etwas Gutes. Nutze jede Gelegenheit zur Freude, dann eröffnet dir das Leben all seine Fülle.»
Er Nacht vom 26. Ougschte 2017 hät ds Tanti fridlich dörfe yschlafe. Liebs Tanti, due fehlsch üns. Vo ganzem Härze gönne wier dier dyni Rueh.  
In Liebi: Dyni Familie