Frouevereinsreis Louene

  09.11.2018 Lauenen, Vereine

Bi wunderschönem Herbschtwätter geit dr Froueverein Louene uf Reise.

Am achti fahrt dr Kübli-Car bim Gältehoreplatz ab u ladet nadisna underwägs no Froue u Manne uf. Zügig schoffiert üs Andreas vo Grüenige ds Simmetal zdürab. Rächts u links chame schön farbegi Herbschtwälder bewundere. O d Simmetalerchüeh oder och anderi gseht me no uf de grüene Weidä. Bir Outobahn Wimmis geits links Richtig Thun. Mier fahre über di rächti Thunerseesite bis uf Hilterfinge. Im Hotel Bellevue, diräkt am See, wärde üs Cafe u Gipfeli serviert.

D Judith het üs tiptop im Griff, Punkt zähni füfedrissg geits witer bis Interlake. Bir Harderstation acho, bsuechemer no churz dr Tierpark (gwöhnigsbedürftig). Zur reservierte Zyt nimmt üs ds Bähnli mit bis Harder Kulm. E wunderschöni Ussicht chame da obe gniesse. Zmittag wird zügig serviert u isch o sehr guet. Nach em Ässe hei di meischte no e Verdouigsspaziergang underno oder eifach die schöni Ussicht gnosse. Am drü sy mer wider mit em vollgschtungete Bähnli nitzi gfahre, wo üs Andreas mit em Car het i Empfang gno. Am linke Seeufer entlang isch är z Leissige richtig Aeschiried zur Chemihütte gfahre.

Aui hei es guets Dessär oder Sändwitsch bschteut u mit dr prächtige Ussicht o gnosse. Am füfi heimer dr letscht Teil vo üser Reis under d Reder gno. Ab Zwöisimme het Andreas wider Froue u Manne verabschidet u bim Gältehorn sy di letschte zfride gäge heim zötelet. Andreas ganz härzleche Dank für dini sicheri Fahrt.

Judith, du hesch üs wider e gmüetleche Tag organisiert, ganz härzleche Dank u bis im Früehlig, irgendwo?

FRAUENVEREIN LAUENEN, ELISABETH BORLE


Möchten Sie weiterlesen?

Ja. Ich bin Abonnent.

Haben Sie noch kein Konto? Registrieren Sie sich hier

Ja. Ich benötige ein Abo.

Abo Angebote