Aendlech hets gschneit und Kind cheu sech usse us tobe im Schnee.

Macht das Spass uf em Bob z Börtli ab z suse un enand mit Schneeballe z bomardiere.

Die Buebe überchöme richtigi roti Backe.

Sie setze sech i Schnee u überlege, was chönnte mer no mache.

Der Peter het d Idee si chönnte e Schneema boue.

Si tröle grossi Rolle u tische die ufe nand.

Si hei scho rächt e grosse Hufe, jetzt müesse si ne no forme.

Z letscht chunnt no der Kopf druf u fertig isch das Wunderwärk.

D Buebe stah stolz  vor dra aber dä Schneema het ja kes Gsicht.

Schnäll springe si hei ga luege, was si chönnte bruche um däm Schneema es Gsicht z mache.

Eine holt es Rüebli usem Kühlschrank, der ander nimmt e Huet vom Vatter.

Jetz gseht der Peter dert uf em Tisch d Brille vom Grossvater.

Aer denkt, die chönnt i däm Schneema a lege, das gsäch doch prima us.

Eigentlich weis är ganz genau, dass die Brille am Grossvater ghört u das är gar nüt me cha läse ohni sini Brille..

Aber paper la pap är nimmt se mit, da wird wohl nüt der mit passiere.

D Rüeblinase chunnt zmitts is Gsicht der Huet obe druf u d Brülle obs Rüebli.

Richtig lustig gseht dä Schneema us mit dene runde Brüllegläser vom Grossvater.

Jetzt  faht Schneeballschlacht vo neuem a.

Dummer wis flügt e Schneeballe diräkt am Schneema a Kopf, u usgrächnet uf Grossvaters Brülle.

So nes Päch, si gheit abe und Gleser falle use.

Am Peterli siner rote Backe si verschwunde, was söll är jetz mache.

Aer nimmt di Brille u wirft se sammt de Gleser ufe Schitterhufe, dert wird se niemer sueche u es hets ja niemer gseh was passiert isch u dass är d Brille het gno.

Siner Fründe wärde ne sicher ou nid verrate.

Der Tag druf isch Wiehnachte gsi.

Scho am z Nacht ässe, wos eigenlich z Lieblingmenü vom Peter het gäh, het är ke Hunger gha.

D Mueter fragt der Peter „Bisch du chrank oder warum issisch du nüt?“ Aer meint är heig eifach ke Hunger.

Oeppis liegt ihm uf em Härz, das isch schwär wi e Stei.

Ir Stube zündet d Mueter d Kerze a u der Grossvater wott d Wihnachtsgschicht us der Bible vorläse.

Das macht är nämlech jedes Jahr.

Aber wo isch jetz die verflixti Brille? Aer cha se nid finde.

Sogar der Peter schlüft zum schien unter e Eckbank zum sueche,

 dass nid öppe no öpper uf di Idee chäm är wüsst wo si wär.

Sie isch eifach nid uf z finde.

Gschicht list du der Vatter.

Peterli gseht dass em Grossvater d Träne über d Backe rolle.

Jetz wird sis Härz no schwärer, är liebt doch der Grossvater über alles.

Jetz mues dä no pläre wäge ihm.

D Kerze am Boum lüchte füre Peter überhoubt nüm.

Aer gspürt nume sis Härz wo sech a fühlt wi e Stei u chlopfet wie wild.

Aer haltets nüme us, är geit zum Grossvater u seit ihm was mit der Brülle passiert isch.

D Mueter u der Peter sueche am Tag druf uf der Schitterbiege nach der Brülle u de Gleser.

Si hei se gfunde u Peter isch mit der Mueter i d Stadt  di Brülle ga flicke.

Jetz mag der Peter wieder gumpe u fröhlech si, sis Härz isch ke Stei me.

Z Jesuschind isch uf d Aerde cho um üs Mönsche z säge, machet Friede u tuet alles wäg wo eues Härz schwär macht

Friede unterenand, das wünsch i Euch allne zur Wiehnacht.