Äs isch emal e wunderschöni Gägend gsy. Da hei e huufe bravi Lüt gwohnt. Si hei Chüe, Schaf u Geissi gha u si mit ne vo de Matte uber d Weideni bis uf d Bärga zoge.

Drum hei si o e huufe Hütti, Ställ u Hüser gha. All die Firschti z erhalte isch e grossi Lascht gsy u si hei hert müesse wärche derfür. Mit der Zyt isch es du e chlei ringer gange. Mu hät du – für vorwärts z cho – sich nimme e so glehig müesse bewege, derfür hät mu sich vil glehiger vorwärts bewegt – d Mobilität isch cho.

Das hät du o anderi Lüt beflüglet, i d Gägend z cho. Si hei gseh, wie schön dass es da isch, u dass mu da o gäre wurdi blybe. Dänetwäge hät mu du afa Hotspots buwe u z erstelle, die künschtlichi Intelligänz seit däm: Brännpunkt, Krisehärd oder – je nach Kontext – e Ort mit viel Aktivität.

E so häts du o e Lösig für di grossi Lascht vo de Hütte, Ställ u Hüser gä. Mu hät sich de uberzellige Firschte entlediget u derbi no guet Gäld verdienet. Die si du o zu chlyne Hotspots umgwandlet worde. Äs isch villycht e chley wyt har greicht, s es mit Abbé Joseph Bovets Lied «Le vieux chalet» z vergliche, dä seit: «La haut sur la montagne croula le vieux chalet. La neige et les rochers s’étaient unis pour l’arracher…», nume si das jetz nimme Schnee u Fels, äs si: «les agences immobilières» u d Bagger. Aber im Lied geits nach Hanses Träne ja no wyter: «Car Jean d’un coeur vaillant, l’a reconstruit plus beau qu’avant.»

All die entledigte Firschte si Bijous, chlyni Hotspots, wunderschöni Chalets worde. I dr Mitti, am Rand u a allne Egge u Ende i der Landschaft ybettet, verbreite si ihru Zouber u ihru Charme.

Du hät du d Obrigkeit gseit, mu müessi jetz ds Land offe bhalte. Mu dörfi ab jetz i der Gägend nume no zwöi Prozänt meh Flächi versigle, we me syner Hütti, Ställ u Hüser wäli erwytere.

Ds Dumma isch nume: Jetz hei di guete Lüt ihru Firschti nimme, wo si hätte brucht, für ihru Ställ u Hüser z ernüwere, si der erloubte versiglete Flächi azpasse u de Vorschrifte z gnüege. D Firscht isch furt u d Flächi o.

Das hät du die gebildete noble Lüt i ihre chlyne Hotspots o bald afa tuure, u si hei ygseh, dass sich öppis müessti ändere. Nume, was sich müessti ändere, da si d Meinigi usenandgange. Drum häts geng weniger Lüt gä, weniger Chüe, weniger Schaf u weniger Geissi – u z letscht häts o die wunderschöni pflegti Landschaft u die schöni Gägend nimme gä, wo sich alli e so drab gfreut hei.

DANIEL BACH, SAANEN