Katrin Lamon-Reichenbach hat ein Gedicht über den Jagderfolg ihres Vaters verfasst, welcher bei der letzten Wildschweinjagd am 15. Januar einen Treffer landete.

Amene schöne, bisige Wintertag,
Papa net deheime sitze mag.
Äs hät gschnitt, was für nes Gfäll,
är packt d Schi, Stäcke u Fäll.
D Walliser Wispile isch sys Ziel,
für ihn es Chinderspiel.
Obna acho würd trunke u gässe,
eifach gniesse u alz vergässe.
Doch, o Schreck: Was muess är gsie,
uf dr Wispile isch gnüelets im Schniee.
Dr Plan isch klar, da gits nüt z gspasse,
däne Süw muess är da hüt ga passe.
Es würd sofort heim pressiert,
ds Hirte u süsch alz organisiert.
Zum mit de Schi uf d Wispile z marschiere,
tuet är dr Jeep i Chnöulis Agg parkiere.
Mu chönnti o mit em Lift ga u eso näh i Chouf,
dass jeda gsiet: Us em Rücksack luegt e Louf.
Acho im Wildsugebiet, würd e Plan usgstudiert.

Wo mu märkt, dass es nüd würd uf dr Loube,
stigt är mit dr Leitere uf ds Dach – net zum Gloube.
Dr Iseküderschufle sei Dank,
entsteit näbem Chämi e chlyna Bank.
Eso tuet är da warte u usharre,
wäg dr bisige Chälti fasch erstarre.
Da chönnti hüt doch scho öppis cho,
will usem Wald hät är Gwigg verno.
Nach langem Warte i dr Bise,
isch si cho die Elise.
Papa isch parat gsy u hät die Su erleit,
wi mu ir Weidmannssprach eso schön seit.
Ds Härz hät gschlage u wild pumpet,
är wieri am liebschte id Luft gumpet.
Jetz muess si nume no heim die Bache,
o das isch für ihn «keine Sache».
D Schi am Rücksack u d Su am Seil parat,
s cha losga mit där nächtliche Wildsuabfahrt.
Für die Su dür ds Rain ahi ds la,
hät är guet am Seili müesse ha.

Si hät nämlich mit Schuss desahi wälle,
är hät sa aber schono möge gställe.
Wo si uf em Brüchli si gsy,
hät Papa agleit syner Schi,
isch mit em Guschi uberd Piste ahi bruuset,
bis sie ir Waldschneise amu verbi isch gsuuset.
Wohl oder übel hät är sa la gah,
will uf de Schi wott mu blibe stah.
Ob öpper dr ander Tag öppis hät gsie uf dr Piste – wär weiss?
Vilicht ds eint oder ander Tröpfi Schweiss…
Bym Outo acho, erliechteret u froh,
dass die Jagd es guets Änd hät gno.
Deheime no dr Su-Tod blase uf em Jagdhore
u sofort ga wärme die chalte Ohre.
Eso öppis macht net jeda Jäger,
du bisch scho e coola Fäger.
E Jagd mit Ski, Leitere, Küderschufle u Seil,
da chamu nume säge: Papa, Weidmannsheil!