Am 25. Septämber sy 32 Froue vom Gsundheitsturne Saane und vor FitGym-Gruppe vor Pro Senectute Gstaad mit der Leiterin Erika Zumbrunnen uf Reise.

Bi schönstem Wätter sy mir ine Gander-Car ygstige, voll motiviert u voller Vorfreud uf das, wo der Tag üs bringt. Ds Motto het gheisse «weiss nid wohi». Es isch grätslet u vermuetet worde, aber alles isch angersch usecho. In Spiez, im Hotel Belvedère, hei Kaffi u Gipfeli uf üs gwartet. So nobel hei mer allwäg no nie Znünikaffe gha, Tische sy deckt gsi mit wysse Tischtüecher u Serviette us Stoff, derzue e schöne Blick ufe Thunersee.

D Fahrt isch du wytergange gäge Thun u vo dert Richtung Seftige, wo d Erika ändlech üsem Gwunder es Änd gmacht het. In Mühlethurnen gäbs e Schrynerei Bigler u die gange mer ga bsueche. Mängem vo üs isch sicher grad düre Chopf, was mir ältere Semeschter ire Schrynerei wei. Was mir aber dert i der Creativ-Abteilig erläbt u gseh hei, isch sehr intressant gsi u alli vo üs wüsse jetzt ou, was Lasertechnik überhoupt isch.

I vier Gruppe yteilt, het Herr Bigler, Laserspezialist Roger u zwö lernendi Bursche üs kompetent alles erklärt u vorgfüehrt.

Ganz verschideni Sujets cha me mit däm Lasercutter härezoubere. Wunderschöni Balkebilder, alti Sageni, Zügligi u no vel meh.

Im Heimatwärch Saane chame ir Usstellig e Ougeschyn dervo näh.

Mittlerwyle ischs Mittag worde u mir hei no chly Wäg vor üs gha. D Fahrt isch wytergange gäge Riggisbärg u Gasel zu. Gasel ligt ir Gmeind Köniz. Ungerwägs hei mer no die ganzi Alpechetti inklusiv Eiger, Mönch u Jungfrou chönne bestuune, bi ganz klarer Sicht – wunderschön.

Üses Zmittag isch nid im Dorf, sondern näbeus im alte Burehus parat gsi. Burefamilie Burren betrybt e Hof mit Muetterchuehhaltig u het als zwöits Standbei e Schüür usboue u bewirtet Gruppe, Hochzyt, Geburtstage etc. Der Buur isch zugleich ou der Koch u wenn er so buuret, wie ner chochet, chunnt das guet.

Mir Froue hei nachem Ässe no müesse ga i Garte luege, was no alles het u dert hei mer ou es Foto gmacht, zwüsche Blueme u Gmües.

Ufem Heimwäg isch der Chauffeur Norbert, e waschächte Friburger, alles über Land gfahre, es Gebiet wo chum öpper vo üs scho mal isch gsi. Sehr ländlich, houptsächlich Landwirtschaft mit grosse, schöne Burehöf. Mir sy Richtung Schwarzeburg, Friburg, La Roche, uf der lingge Syte vom Greyerzersee verbi, nach Bulle ume üser Heimat zue.

Der Erika ganz härzliche Dank für dä schöni Tag, all die Arbeit u Müeh. Es grosses Merci ou em Chauffeur, är het üs sicher dür d Gägend kutschiert u mit sir agnähme Art u em Friburger Dialäkt ou zum schöne Tag bytreit.

HEDY BURI, FEUTERSOEY