banner
banner
banner
banner
banner

Usflug Altersstubete vor Chirchgmei Saanen-Gsteig und em Froueverein Saanen

Fr, 21. Jun. 2019
Di prächtigi Orgele FOTO: ROSMARIE AELLEN

Dr Pfarrer Peter Klopfestein het fer üns e Reis gäge ds Wältscha usagsuecht. Dr Chauffeur vo Kübli Reise, Ruedi Neuhaus, het em Schönried afa Lüt la zuestyge, im Gstaad o. Ds Poschtouto het o Reiseluschtigi bracht vam Türpach u vam Gsteig; jetz fahrt er no a Bahnhof Saane, da sy o Lüt parat. 38 Gäscht sitze erwartigsvoll im Outocar u gniesse d Fahrt Richtig Rougemont. Dr Pfarrer nimmt ds Mikrofon, begrüesst ali nomal u verzellt dr Tagesplan.

Dür di prächtig grüeni u blüeigi Gägend fahre wer zfryde dem Dörfli St-Martin zue. Wier gseh e Chilche va wytem u grad drnäbe sygi ds Restaurant Croix fer Gaffipouse! Also, ahalte, ali usstyge … ja, u jetz? Die erwarte üns ja gar nit! Es gäbi opa füf Kilometer wyter no einisch e Chilche o miteme Croix drnäbe: Croix fédéral. Hopp, zrugg i Car, wyter, u de isch alls richtig cho! Dr Gaffi isch prima gsy u d Gipfeleni hei gmundet, merci de Spender!

Drnah isch Ruedi gäge Lausanne zue: Wier hei wele u törfe ga Kathedrale aluege. Wier hei e rächta Fuessmarsch gmacht vam Reisebus zur schöne Chilche. Es sygi di gröschti vor Schwyz. D Füehrer sy scho parat gstande fer ünser zwo Gruppi. Also, ünsi Dame het scho rächt lyslig gredt. Ganz nah het mu d Madame no grad verschtande, aber es bitzi wyter awäg isch schwirig worde … Di vile Jahreszahli sy nit allne Bsuecher eso wichtig, ydrücklich sy meh ds Alter u d Schönheit vo där Kathedrale. D Vorstellig, eso ne gwaltiga Buw z erstele ohni Krane, Maschini u Strom, also bloss mit Menschechraft u endlosem Ysatz, git eim o es Bild! Wier sy dr Meinig gsy, o d Löhn syge sicher nit eso uberwältigend höi usgfale. Beydruckend sy ging wider di wunderbare Chilchefänschter, u die verzelte Ereignis us der Chrischtegschicht u o us dr Zyt, wo das Wärch isch entschtande. Item, es het nachenandere etlichi Chilchi gä uf däm Platz i verschidene Bouetappe. Im Jahr 1275 isch di jetzigi Kathedrale vom Papscht Grégoire dr Zäht gsägnet worde. Dä isch extra ygladna vo Rom uf Lausanne cho, u och der Rudolf vo Habsburg isch awäsend gsy – also, e wichtigi Sach! Di Chilche isch lang ds Ziel gsy vo Wallfahrer u mu het o vo Wunderheiligi a Chranke verzellt; hüt reise si derfür nach Lourdes … Hetti ächt dr Buw vomene Abeehüsli ds Buwbudget uberstyge? Es het imel ging no kis …

Prächtig isch natürlich di wunderschöni Orgele, entworfe vamene italiänische Designer für schnälli Outo! Si isch ersch vor guet zäh Jahr installiert worde u vom Juni bis Oktober sy all Fritig Konzert vo Organischte us ganz Europa z köre u z gniesse. Renoviere isch fasch ging agseit: D Renovation vom grosse Turm söll i drüne Jahre fertig wärde.

Dr Wäg var Kathedrale zum Car isch churz gsy – sehr zur Fröid va üns Langsamere. Soli, bald gits öppis Zabe, Hunger hei wer ja scho!

Gsterkt si wer nahär gäge d Ländti, mitem Schiff ubere Lac Léman uf Montreux u da hät nus Ruedi erwartet. Schifffahre isch äbe scho beliebt, o bi Bärglerlüte! Di Pouse am See, zum Spaziere oder eifach Sy, isch tifig vergange. Ystige u ab Richtig Aigle. Die Heimreis kene wer ali: e huffe eng Kurvi, wo ünsa Chauffeur guet im Griff het; gstüpft Outofahrer, wo uberhole, dass mu dr Chopf schüttlet, gits halt o hie! Merci, Ruedi, fer dyni sicheri Fahrt!

Scho bald seit ünsa Pfarrer alne uf Widerluege une gueta Summer. Och a ihn es härzlichs Danke fer syni Müeih! Die erschte styge us ir Feutersoey u de minderets grüppeliwys – hoffentlich sy ali guet u zfride heim cho. Wes Gotts Wile isch: uf Widerluege u bis nächschts Mal!

ROSMARIE AELLEN

Category: 

Kommentare

Neuen Kommentar schreiben

Die Emailadresse wird nicht veröffentlicht oder an dritte weitergegeben. Sie wird nur zu Kontaktzwecken im Zusammenhang mit diesem Kommentar verwendet.
CAPTCHA
Diese Frage hat den Zweck zu testen, ob Sie ein menschlicher Benutzer sind und automatisiertem Spam vorzubeugen.

Kommende Events

Stellen

Immobilien

Diverses

Trending

1

10 Jahre später – noch kein Ende in Sicht

Heute vor zehn Jahren wütete im Rübeldorf Saanen ein Jahrhundertunwetter. Es entstand hoher Sachschaden. Gebäude, Strassen, Infrastrukturen und das Gerinne des Chalberhönibachs wurden in Mitleidenschaft gezogen. Doch mit den geplanten Schutzmassnahmen geht es kaum vorwärts.

KEREM S. MAURER
Die Gebäudeversicherung stellte über 100 Schäden fest und bezifferte damals in einer ersten Schätzung die Schadenssumme auf rund vier Millionen Franken (wir hab...